സാക്ഷാല്‍ ബാല്‍ താക്കറേ അവശനും രോഗിയും വയസ്സനുമാണ്, കരുണാകരനെ പോലെ. ആവുന്ന കാലത്ത് ഉണ്ടാക്കിവച്ചതെല്ലാം വയസ്സുകാലത്ത് തിരിഞ്ഞുകൊത്തുന്ന അനുഭവം കരുണാകരനുള്ളത് പോലെ നമ്മുടെ താക്കറേക്കുമുണ്ട്. എന്തായിരുന്നു ഇന്നലെകള്‍! വീട്ടിലെ ചാരുകസേരയില്‍ കിടന്ന് ബാല്‍ താക്കറേ അയവിറക്കുകയാണ് -

അന്നൊന്നും ഈ കാവി നിറത്തിന് ഇത്ര തുടുപ്പില്ല. ബോംബെ നഗരം മെട്രോ നഗരമായി, ഇന്ത്യയുടെ വ്യാപാര തലസ്ഥാനമായി മാറിക്കൊണ്ടിരിക്കുകയാണ്. അവിടവിടെ ദാദാഗിരികള്‍ പൊങ്ങിവരുന്നുണ്ട്. വരുത്തരുടെ നഗരമായതിനാല്‍ ഗലികളില്‍ തമിഴും തെലുങ്കും ഹിന്ദിയും ഇടകലര്‍ന്ന് കേള്‍‌ക്കാനുണ്ട്. തൊള്ളായിരത്തി അറുപതുകള്‍! ഹോ, ആലോചിക്കുമ്പോള്‍ കുളിരുകോരുന്നു!

ദേശീയത മൊത്തം വടക്കന്മാരുടെ കയ്യിലാണല്ലോ അല്ലെങ്കില്‍, കയ്യില്‍ ആവേണ്ടതാണല്ലോ? എന്നാല്‍ പുറത്തേക്ക് നോക്കിയാലോ, കുറേ മദ്രാസികള്‍.. ജനനനിയന്ത്രണമൊന്നും ഗലികളില്‍ ഇല്ലെന്ന് തോന്നുന്നു. കൂത്താടികളെപ്പോലെ ഇവറ്റ ഇങ്ങനെ പടര്‍ന്നാല്‍ മദ്രാസ് സംസ്ഥാനത്തിന്റെ ചെറു പതിപ്പാവും ബോംബെ. അത് നടക്കരുത്. അണ്ണാറക്കണ്ണാനും തന്നാലാവത് ചെയ്യണമല്ലോ. തല ചൊറിഞ്ഞു, ചുറ്റും നോക്കി. എന്തോ കണ്ണിലുടക്കി. ചില്ലിട്ട ഫ്രെയിമില്‍ നിന്ന് നോക്കി ചിരിക്കുന്നത് ശിവജിയല്ലേ! മറാഠാ, മറാഠീ എന്നൊക്കെ കേട്ടാല്‍ ചോര തിളക്കണം എന്ന് പാടിയ കക്ഷിയാണ്.

എന്തൊരു രസമായിരുന്നു അക്കാലം. ചോരയൊലിപ്പിച്ചുകൊണ്ട് ഓടുന്ന മദ്രാസിയുടെ നാഭിയില്‍ തന്നെ തൊഴിക്കുന്ന ആ രസമുണ്ടല്ലോ. അത് അനുഭവിച്ചറിയുക തന്നെ വേണം. പോക്കണം കെട്ട വര്‍ഗ്ഗമാണ്. ഇന്ത്യയുടെ ദേശീയതയിലൊന്നും ഇവറ്റയ്ക്ക് വിശ്വാസമില്ല. ദ്രാവിഡരാണെത്രെ! അങ്ങനെ ശിവസേന പിറന്നു. ശിവജിയുടെ സേവകരാണ്. മറാഠിക്ക് വേണ്ടി ജീവന്‍ കളയും.

സംഭവമേറ്റു. പീക്കിരിപ്പിള്ളാര്‍ വരെ സേനയുടെ കൊടിയുമേന്തി ദ്രാവിഡവേട്ടക്കൊരുങ്ങി. മണ്ണ് മണ്ണിന്റെ മക്കള്‍ക്ക്. വരുത്തര്‍ക്കല്ല. ബീഹാര്‍, മധ്യപ്രദേശ്, രാജസ്ഥാന്‍, ഉത്തര്‍‌പ്രദേശ്, ഗുജറാത്ത് എന്നിവിടങ്ങളില്‍ നിന്ന് വന്നവരും വരുത്തരല്ലേ എന്ന് ചോദിക്കുന്നവര്‍ക്ക് ബോധമില്ല. വടക്കന്‍ ഗോസായിക്കും കൂടി ഉള്ളതാണ് ബോംബെ. ഹിന്ദിയും മറാഠിയും ഭായീ ബഹനല്ലേ! പ്രശ്നം ദ്രാവിഡമല്ലേ!

കുറേയെണ്ണത്തിനെ കൊല്ലുകയും തല്ലുകയും ചെയ്തപ്പോള്‍ മുന്തിയവന്മാര്‍ വിളിച്ചു. സംഭവം അവസാനിപ്പിക്കാന്‍ പറഞ്ഞു. സംഭവം അവസാനിപ്പിച്ചാല്‍ ശിവസേനയും അവസാനിക്കുമെന്ന് ബോധിപ്പിച്ചു. അതൊന്നുമുണ്ടാവില്ല, നമുക്ക് സഹകരിക്കാമെന്നായി ചില കാവിക്കൊടികള്‍. ഹിന്ദിയും മറാഠിയും ഒന്നിച്ചാല്‍ അതിനൊരു കാവിനിറം വരിക സ്വാഭാവികം. ഒന്നുമില്ലെങ്കിലും എല്ലാവരും ഹിന്ദുക്കളല്ലേ! അതുകൊണ്ട് സമ്മതിച്ചു. പിന്നീടങ്ങോട്ട് മൊത്തമൊരു സഹകരണബാങ്ക് ആയിരുന്നു. ബാബറിപ്പള്ളി പൊളിക്കാന്‍ മുമ്പില്‍ തന്നെയുണ്ടായിരുന്നു.

അന്ന് തൊട്ട് ഇന്നോളവും വലിയ കുഴപ്പങ്ങളൊന്നും ഇല്ലാതെ കഴിഞ്ഞുപോരുകയായിരുന്നു. മറാഠിയുടെ അവകാശങ്ങളല്ല, ഹിന്ദുത്വമാണ് ശിവസേനയുടെ അജണ്ടയെന്ന് ചില കുരുത്തം‌കെട്ടവര്‍ ഇടക്കിടെ പറഞ്ഞുപരത്തുന്നുണ്ടായിരുന്നു. രണ്ടും ഒന്നാണെന്ന് ഇവറ്റയ്ക്ക് മനസ്സിലാവുന്നില്ലല്ലോ!

ചുവരിലെ ഫ്രെയിമിട്ട ആ ചിത്രം ഇപ്പോഴുമുണ്ട്. നീട്ടിപ്പിടിച്ച ആ വാളിന്റെ പെയിന്റ് ഇളകിപ്പോയിരിക്കുന്നു. എങ്ങനെ ഇളകിപ്പോവാതിരിക്കും. കലികാലമല്ലേ! നില മറന്നാണ് ചില വൃത്തികെട്ടവന്മാര്‍ ആടുന്നത്. സ്വന്തം മരുമകനെ പറ്റിയാണ് പറയുന്നത്. പാര്‍ട്ടി അധ്യക്ഷസ്ഥാനം മകന് കൊടുക്കാതെ മരുമകന് ആരെങ്കിലും കൊടുക്കുമോ? ഉദ്ദവിനെ അരിയിട്ട് വാഴിച്ചതില്‍ പിന്നെയാണ് ഈ അസുരവിത്തിന് ദണ്ഡമിളകിയത്. ഇപ്പോഴത് മൂര്‍ധന്യാവസ്ഥയിലും എത്തിയിരിക്കുന്നു.

മറാഠി, ഹിന്ദി ഭായിഭായീ എന്ന് മഹാകോടി തവണ ഉരുക്കഴിച്ചെടുത്ത മന്ത്രമാണല്ലോ ഈ രാജന്‍ ചെക്കന്‍ കൊളമാക്കുന്നത്. മഹാരാഷ്ട്രാ നവനിര്‍മ്മാണ്‍ സേനയാണെത്രെ ചെക്കന്റെ വാനരസേന! ശിവസേന നിര്‍മ്മിക്കാത്ത എന്ത് പുതിയതായി നിര്‍മ്മിക്കാനാണാവോ ചെക്കന്‍ വാളുമെടുത്ത് പൊറപ്പെട്ടിരിക്കുന്നത്? വടക്കേയിന്ത്യക്കാരാണെത്രെ ചെക്കന്റെ പ്രഖ്യാപിത ശത്രുക്കള്‍. മൊത്തം ബിമാരുക്കളെയും* മുംബൈയില്‍ നിന്ന് ഓടിക്കണം എന്നാണ് പയ്യന്റെ മനസ്സിലിരുപ്പ്. കണ്ണില്‍ കാണുന്ന സകല ബിമാരുക്കളെയും വളഞ്ഞിട്ട് തല്ലുകയാണ് നിര്‍മ്മാണ സേനക്കാര്‍!

ഇതൊക്കെ താന്‍ പണ്ട് കളിച്ച കാര്‍ഡുതന്നെ. ദ്രാവിഡര്‍ക്കെതിരെ കളിച്ച കാര്‍ഡ് മറിച്ച് ബിമാരുക്കള്‍ക്കെതിരെ പ്രയോഗിക്കുകയാണ് ചെക്കന്‍. കരുണാനിധിയും മറ്റുമാണ് ചെക്കന്റെ മാനസഗുരുക്കന്മാര്‍. ഒരു മറാഠിക്ക് ഇത്ര അധഃപതിക്കാനാവുമോ? ഓര്‍ക്കൂട്ടിലോ മറ്റ് പോസ്റ്റിട്ട് പീക്കിരിപ്പിള്ളാരെ സംഘടിപ്പിക്കുന്നുണ്ടെത്രെ ഈ വിരുതന്‍. പൂവിട്ട് പൂജിക്കേണ്ട വടക്കേയിന്ത്യന്‍ ഗോസായിമാരെ ഓര്‍ക്കൂട്ടിലിരുന്ന് ആട്ടുകയാണ് ഈ പീക്കിരിപ്പിള്ളാര്‍. ഇതൊന്നും നല്ലതിനല്ല എന്നേ പറയാനുള്ളൂ.

*BIMARU – Bihar, Madhya Pradesh, Rajasthan, Uttar Pradesh

രാജ്യത്തെ ഏറ്റവും വലിയ ജോബ് പോര്‍ട്ടലുകളില്‍ ഒന്നായ നൌകരി ഡോട്ട് കോം, ഒരു ദളിത് ഡാറ്റാബേസ് ഉണ്ടാക്കിയിരിക്കുന്നു. ജോലിക്കാരെ തേടുന്ന കമ്പനികള്‍ക്കിനി നൌകരിയുടെ ദളിത് ഡാറ്റാബേസില്‍ നിന്ന് SC, ST, OBC ഉദ്യോഗാര്‍ത്ഥികളെ തിരഞ്ഞെടുക്കാം. നൌകരിയുടെ ഇപ്പോഴത്തെ കണക്കനുസരിച്ച് ദളിത് ഡാറ്റാബേസില്‍ 130,000 OBC കള്‍, 38,000 SC-STകള്‍ ഉണ്ടെത്രെ.

പിന്നോക്ക വിഭാഗങ്ങളില്‍ നിന്ന് ഉദ്യോഗാര്‍ത്ഥികളെ തിരഞ്ഞെടുക്കാന്‍ ആഗ്രഹിക്കുന്ന കമ്പനികളെ സഹായിക്കാനും പിന്നോക്ക വിഭാഗത്തിലെ ഉദ്യോഗാര്‍ത്ഥികള്‍ക്ക് താങ്ങായിരിക്കാനുമാണ് ഈ ഡാറ്റാബേസ് ഉണ്ടാക്കിയിരിക്കുന്നതെന്ന് ഇന്‍ഫോ‌എഡ്ജിന്റെ സി‌ഇ‌ഒ സഞ്ജീവ് ബിക്‌ചന്ദാനി പറയുന്നു.

(സോഴ്സ് – റെഡിഫ്)

സത്യത്തില്‍ ഈ വാര്‍ത്ത ഒരു ഷോക്കാണെന്നില്‍ ഉണ്ടാക്കിയത്. ഇത് നെഗറ്റീവ് ഇമ്പാക്റ്റാണോ അതോ പോസറ്റീവ് ഇമ്പാക്റ്റാണോ ഉണ്ടാക്കാന്‍ പോവുന്നതെന്ന് മനസ്സിലാവുന്നില്ല. എങ്കിലും ചില ചിന്തകള്‍ പങ്കുവയ്ക്കട്ടെ.

1. രാജ്യത്ത് “സംവരണം പാടില്ല” എന്ന് ആര്‍ത്തട്ടഹസിക്കുന്നവര്‍ക്ക് തീര്‍ച്ചയായും ഇതൊരു ബ്ലോ ആണ്. അറിയാതെ പുറത്ത് വന്ന് വീണ ഒരു ചാട്ട, അതും പ്രൈവറ്റ് സെക്ടറുമായി ബന്ധപ്പെട്ട്.

2. “ദളിത് – സവര്‍ണ ഈക്വാലിറ്റി വേണം” എന്ന് വാദിക്കുന്നവര്‍ക്കും ഇതൊരു കീറാമുട്ടിയാണ്. ദളിതരെ കമ്പനികളില്‍ എടുക്കാനും ഒഴിവാക്കാനും ഈ ഡാറ്റാബേസ് ഉപയോഗിക്കാം എന്നതുതന്നെ കാരണം.

3. രണ്ട് രീതികള്‍ക്കും ഒരുപോലെ ഉപയോഗിക്കാവുന്ന ഡാറ്റാബേസ് ഉണ്ടാക്കി, ബിസിനസ്സാക്കുന്ന നൌകരിയുടെ പുതുരീതി, കൂടുതല്‍ “സെന്‍സിറ്റീവ്” ഡാറ്റാബേസുകള്‍ക്ക് വഴിവയ്ക്കാം എന്ന് ഭയക്കേണ്ടതുണ്ട്.

4. പൌരാണിക ഇന്ത്യയില്‍ ജനിച്ച്, രാജ്യത്തെ ഭൂരിപക്ഷം വരുന്ന അവര്‍ണരെ അടിമകളാക്കി, സ്വാതന്ത്ര്യം കിട്ടിയിട്ടും അവരുടെ ചോരയൂറ്റിക്കുടിക്കുന്ന ജാതിപ്പിശാചിന്റെ കരങ്ങള്‍, പോസ്റ്റ്-മോഡേണ്‍ കാലത്തെ കമ്പനികളെ നിയന്ത്രിക്കുന്ന അവസ്ഥ വരുന്നത് ശരിക്കും ഷോക്ക് തരുന്നു.

നിങ്ങളെന്ത് കരുതുന്നു?

ബന്ദ് നടത്തുമ്പോള്‍ ഭരണഘടന അനുശാസിക്കുന്ന നിബന്ധനകള്‍ പാലിക്കാത്ത തമിഴ്‌നാട് സര്‍ക്കാരിനെ പിരിച്ചുവിടാന്‍ ലജ്ജിക്കേണ്ടതില്ലെന്ന് കേന്ദ്രസര്‍ക്കാരിനോട് സുപ്രീം‌കോടതി.

“ഇതൊരു സര്‍ക്കാരാണോ? ഇതാണോ തമിഴ്‌നാട് സര്‍ക്കാര്‍? യുണൈറ്റഡ് പ്രോഗ്രസ്സീവ് അലയന്‍സിനെ ശക്തമായി പിന്തുണയ്ക്കുന്ന കക്ഷിയായ ഡി എം കെ സര്‍ക്കാരാണോ ഇത്? ഇതാണ് ഡി എം കെ സര്‍ക്കാരിന്റെ മനോഭാവമെങ്കില്‍ ഈ സര്‍ക്കാരിനെ പിരിച്ചുവിടാനും തമിഴ്‌നാട്ടില്‍ രാഷ്ട്രപതി ഭരണം ഏര്‍പ്പെടുത്താനും യു പി എ സര്‍ക്കാര്‍ ലജ്ജിക്കേണ്ടതില്ല” സീനിയര്‍ മോസ്റ്റ് ജഡ്ജായ ജസ്റ്റിസ് ബി എന്‍ അഗ്രവാള്‍ ഉള്‍‌പ്പെടുന്ന ബഞ്ച് ഒക്ടോബര്‍ ഒന്നിന് നിരീക്ഷിച്ചു.

തമിഴ്‌നാട്ടില്‍ ഡി എം കെ ആഹ്വാനം ചെയ്ത ബന്ദിനെതിരെ എ ഐ ഡി എം കെ സമര്‍പ്പിച്ച ഹര്‍ജി സെപ്തംബര്‍ മുപ്പതാം തീയതി ഞായറാഴ്ചയായിരുന്നിട്ടും സുപ്രീം‌കോടതി പരിഗണനയ്ക്കെടുത്തിരുന്നു. അപൂര്‍വ്വങ്ങളില്‍ അപൂര്‍വ്വമായാണ് സുപ്രീം‌കോടതി അവധിദിവസമായിട്ടും കേസ് പരിഗണിക്കുന്നത്. ജസ്റ്റിസിന്റെ വീട്ടില്‍ വെച്ചാണ് കേസ് പരിഗണനയ്ക്ക് എടുത്തത്. ജനജീവിതം സ്തംഭിപ്പിച്ച് ബന്ദ് നടത്തുന്നതിനെതിരെ കേരള ഹൈക്കോടതിയുടെ നിരീക്ഷണങ്ങള്‍ ചൂണ്ടിക്കാട്ടിക്കൊണ്ട് സുപ്രീം‌കോടതി ഒക്ടോബര്‍ ഒന്നിന് ഡി എം കെ നടത്താനിരുന്ന ബന്ദ് തടയുകയും ചെയ്തു.

ആഗസ്റ്റ് മുപ്പതിനാണ് സേതുസമുദ്രം പദ്ധതിയുടെ സാധുത ചോദ്യം ചെയ്യുന്ന ഹര്‍ജി സുപ്രീം‌കോടതി പരിഗണിച്ചത്. രാം സേതു അല്ലെങ്കില്‍ ആഡംസ് ബ്രിഡ്ജ് എന്നറിയപ്പെടുന്ന പാലം നശിപ്പിക്കുന്നതില്‍ നിന്ന് ജസ്റ്റിസ് അഗ്രവാള്‍ അടങ്ങുന്ന സുപ്രീം‌കോടതി ബഞ്ച് കേന്ദ്രസര്‍ക്കാരിനെ തടഞ്ഞിരുന്നു. ഇതിനെ തുടര്‍ന്ന് അരങ്ങേറിയ പ്രസ്താവനാ യുദ്ധങ്ങള്‍ക്കും കലാപങ്ങള്‍ക്കും “തലവെട്ടല്‍” ഫത്‌വകള്‍ക്കും അവസാനം ഡി എം കെ, തമിഴ്‌നാട്ടില്‍ ബന്ദ് ആഹ്വാനം ചെയ്യുന്നതാണ് പിന്നെ നാം കണ്ടത്.

സുപ്രീം‌കോടതി ബന്ദ് തടഞ്ഞെങ്കിലും സമരം എന്ന പേരില്‍ ബന്ദ് തന്നെയാണ് തമിഴ്‌നാട്ടില്‍ അരങ്ങേറിയത് എന്ന് കാണിച്ചുകൊണ്ട് എ ഐ ഡി എം കെയുടെ കൌണ്‍‌സില്‍ ഒക്ടോബര്‍ ഒന്നിന് വീണ്ടും സുപ്രീം‌കോടതിയെ സമീപിച്ചപ്പോഴാണ് ബഞ്ച് മുകളില്‍ പരാമര്‍ശിച്ച നിരീക്ഷണം നടത്തിയത്.

രണ്ട് വാദങ്ങളും – ആഗസ്റ്റ് മുപ്പതിനും സെപ്തംബര്‍ മുപ്പതിനും നടന്നവ – ചീഫ് ജസ്റ്റിസ് കെ ജി ബാലകൃഷ്ണന് കേള്‍ക്കാനായില്ല. ചീഫ് ജസ്റ്റിസ് സ്ഥലത്തുണ്ടായിരുന്നില്ല. പകരം സീനിയര്‍ മോസ്റ്റ് ജഡ്ജായ ജസ്റ്റിസ് അഗ്രവാള്‍ അടങ്ങുന്ന ബഞ്ചാണ് ഇരുവാദങ്ങളും കേട്ട് തീര്‍പ്പ് കല്‍പ്പിച്ചത്.

രാജ്യത്തെ പരമോന്നത നീതിപീഠത്തിന്റെ ഈ നിരീക്ഷണം ഒട്ടേറെ വ്യാഖ്യാനങ്ങള്‍ക്കും വിവാദങ്ങള്‍ക്കും വഴിമരുന്നിട്ടേക്കാം.  

(വാര്‍ത്തകള്‍ക്ക് കടപ്പാട് – മലയാളം വെബ്‌ദുനിയ, ഹിന്ദുസ്ഥാന്‍ ടൈംസ്)

തമിഴ്‌നാടിനെയും ശ്രീലങ്കയെയും ബന്ധിപ്പിക്കുന്ന സേതുസമുദ്രം പദ്ധതിയെ പറ്റിയുള്ള വിവാദങ്ങള്‍ ഇന്നോ ഇന്നലെയോ തുടങ്ങിയതല്ല. രാവണനെ ആക്രമിക്കാനായി ശ്രീലങ്കയിലേക്ക് കടക്കാന്‍ ശ്രീരാമനും സൈന്യവും സമുദ്രത്തിലൂടെ ഉണ്ടാക്കിയ പാതയാണെത്രേ “രാമര്‍ പാലം”. ഇത് ഐതിഹ്യം. ഈ ഐതിഹ്യത്തിലാണ് സേതുസമുദ്രം പദ്ധതി കത്തിവയ്ക്കുന്നത്.

തമിഴ്‌നാടിന്റെ വികസനത്തിന് സേതുസമുദ്രം പദ്ധതി വളരെയേറെ ഗുണം ചെയ്യുമെന്നും തമിഴ്‌നാടിന്റെ വികസനത്തിന് തുരങ്കം വയ്ക്കുന്ന രീതിയില്‍ ഐതിഹ്യകഥയ്ക്ക് വളര്‍ച്ചയില്ലെന്നും കരുണാനിധിയും ഡി.എം.കെയും പ്രഖ്യാപിച്ചിരിക്കുകയാണ്. എന്നാല്‍ രാമര്‍ പാലത്തിന് ഒരു പോറല്‍ പോലും ഉണ്ടാവാന്‍ സമ്മതിക്കുകയില്ലെന്ന് തീവ്രഹിന്ദുക്കള്‍. തെരുവിലിറങ്ങി പോരാടാന്‍ തന്നെയാണ് അവരുടെ നീക്കം. ഈ സംഘര്‍ഷം ഇപ്പോള്‍ കയ്യാംകളിയില്‍ എത്തിനില്‍ക്കുന്നു.

ഈയടുത്ത ദിവസങ്ങളില്‍ നടന്ന കയ്യാങ്കളികളുടെയും വാക്‌പോരിന്റെയും ഒരു കൊളാഷ് മലയാളം വെബ്‌ദുനിയയില്‍ പ്രസിദ്ധീകരിച്ചിരിക്കുന്നു….